});

ክቡር ሚንስተር



[የክቡር ሚኒስትሩ ወዳጅ ከውጭ አይፓድ ልኮላቸዋል፡፡ ክቡር ሚኒስትሩ የተላከላቸው ዕቃ ምን እንደሆነ ስላልገባቸው አማካሪያቸውን አስጠሩት]

  • ፈለጉኝ ክቡር ሚኒስትር?

  • በጣም ነው እንጂ የፈለኩህ፡፡

  • ምን ፈልገው ነው?

  • አንድ ነገር እንድትረዳኝ ነው፡፡

  • ብዙ ሥራ ግን አለብኝ፡፡

  • ሥራ የምሰጥህ እኔ መሆኔን ረሳኸው እንዴ?

  • አይ ማለቴ የግል ሥራ እንዳያሠሩኝ ብዬ ነው፡፡

  • የግል ሆነ የጋራ እሱ አይመለከትህም፡፡

  • ምን አሉኝ?

  • አሁን ና እዚህ አጠገቤ ቁጭ በል፡፡

  • ምን ፈልገው ነው ክቡር ሚኒስትር?

  • ምንድን ነው ይኼ?

  • ይኼማ አይፓድ ነው፡፡

  • ምንድን ነው እሱ ደግሞ?

  • ኧረ ብዙ ጥቅም አለው፡፡

  • እኮ ምን?

  • ለምሳሌ በዚህ ኖት መያዝ ይችላሉ፡፡

  • ወረቀትና እስክሪብቶ አለ አይደል እንዴ?

  • አሁን እኮ ኢንቫሮመንት ፍሬንድሊ ሆነው ብዙ ወረቀት መጠቀም ማቆም አለብዎት፡፡

  • ሌላ ምን ጥቅም አለው?

  • ኢንተርኔትም ያስጠቅማል፡፡

  • ይኼማ ያደድብሃል ማለት ነው፡፡

  • እንዴት ክቡር ሚኒስትር?

  • ኢተርኔት ከተጠቀምክ ብዙ አታነብማ፡፡

  • እንዴ ክቡር ሚኒስትር ኢንተርኔት ላይ እኮ ብዙ የሚነበብ ነገር አለ?

  • ምን ፌስቡክና ወሬ አይደለም እንዴ ያለው?

  • ኧረ በዩ ቲዩብ ቪዲዮ ምናምን ማየት ይችላሉ፡፡

  • ቪዲዮም ማየት እችላለሁ?

  • አዎን ክቡር ሚኒስትር፡፡

  • አሁን ጥቁር ፍቅርንና ዛራና ቻንድራን እዛ ቲዩብ ላይ አገኘዋለሁ?

  • እሱን እንኳን የራሳቸው ዌብሳይት ላይ ነው የሚያገኙት፡፡

  • ይህቺ ነገር ጠቃሚ ሳትሆን አልቀረችም፡፡

  • ከፈለጉም ፎቶና ቪዲዮ ማንሳት ይችላሉ፡፡

  • በዚህ?

  • አዎና፡፡

  • በቃ እኔማ ምን እንደማደርግ አውቃለሁ፡፡

  • ምን ሊያደርጉ?

  • በቃ እነዛ ስሜን የሚያጠፉትን ሰዎች በዚህ ቪዲዮ ቀድቻቸው እከሳቸዋለሁ፡፡

  • እነሱ እኮ ስምዎትን እያጠፉ አይደለም፡፡

  • ታዲያ ሙሰኛ ነው እያሉ ምን እያደረጉኝ ነው?

  • መረጃ እኮ አላቸው፡፡

  • መረጃውን ያቅርቡዋ፡፡

  • ኧረ ይተዉ ክቡር ሚኒስትር፡፡

  • ለማንኛውም እስቲ ክፈተው፡፡

  • ይኸው ክቡር ሚኒስትር፡፡

  • እንዴት ነው የማበራው?

  • ይኸው አብርቼዋለሁ፡፡

  • ከዛ ምንድን ነው የማደርገው?

  • የፈለጉት ቦታ ሲነኩት ይሠራል፡፡

  • ይኸው ነካሁት፡፡

  • እሱ እኮ ጀርባው ነው፡፡

  • ታዲያ የፈለክበት ቦታ ንካው አላልከኝም እንዴ?

  • ክቡር ሚኒስትር አንድ ችግር እንዳለብዎት ተረዳሁ፡፡

  • የምን ችግር?

  • የንቃተ ህሊና!

[ክቡር ሚኒስትሩ ከአፍሪካ አገር ከመጣ ሌላ ሚኒስትር ጋር ምሳ እየበሉ ነው]

  • እንዴት ነዎት ክቡር ሚኒስትር?

  • እንዴት ነህ ባክህ?

  • አለን አለን፡፡

  • ለሥራ መጥተህ ነው?

  • ኧረ ለመዝናናት ነው የመጣሁት፡፡

  • ለነገሩ ኢትዮጵያ እኮ ለመዝናናት ትመቻለች፡፡

  • እንዴ በደንብ እንጂ ክቡር ሚኒስትር፡፡

  • ታዲያ የት ነው ያረፍከው?

  • እዚህ እኮ ቤት ገዝቻለሁ፡፡

  • ጥሩ አድርገሃል፡፡

  • ኢንቨስትመንት ውስጥም እኮ ገብቻለሁ፡፡

  • ባለሀብት ሆነሃላ?

  • ያው እንግዲህ ተያይዘነዋል፡፡

  • ለመሆኑ ገንዘቡን ከየት አምጥተህ ነው?

  • ምን እኛ አገር ሙሰኛ ያልሆነ ባለሥልጣን አለ እንዴ?

  • የእኛው ጐራ ነሃ?

  • በሚገባ ክቡር ሚኒስትር፡፡

  • ለመሆኑ ምን ምን ትሠራለህ?

  • እንዴ ክቡር ሚኒስትር የሎጂስቲክስ ሥራው ውስጥ ታዋቂ የሆነ ድርጅት አለኝ፡፡

  • ምን እኔም እኮ እዛ ዘርፍ ውስጥ አለሁ፣ ግን የአንተን ድርጅት አላውቀውም፡፡

  • ከዛም ባሻገር በሪል ስቴት ዘርፉ እየተመነደገ ያለ ድርጅት አለኝ፡፡

  • አየህ የማላውቀው ለዛ ነዋ፣ የእኔ ድርጅት ተመንድጐ ጨርሷል፡፡

  • ሌላስ ምን ይሠራሉ?

  • አሁን ደግሞ ብራንድ ሆቴሎች አገራችን እየበዙ ስለመጡ፣ ጭስ አልባውን ኢንዱስትሪ ለመቀላቀል አስቤያለሁ፡፡

  • በነገራችን ላይ ክቡር ሚኒስትር…

  • ምንድን ነው?

  • ፕራይቬት ጄት ልገዛ ነው፡፡

  • እኔ እንኳን የአቪዬሽን ኢንዱስትሪው መሽቆልቆል ላይ ስላለ ያሰብኩት ሌላ ነገር ለመግዛት ነው፡፡

  • ምን ሊገዙ ነው?

  • መርከብ!

[የክቡር ሚኒስትሩ የቅርብ ዘመድ ከገጠር ቤታቸው መጥቷል]

  • እንዴት ነዎት ጋሼ?

  • ምን ልታደርግ መጣህ?

  • ጋሼ ኑሮ በጣም አስቸገረኝ፡፡

  • አሁንም በቃ መጠጣት አላቆምክም አይደል?

  • ወድጄ አይደለም እኮ የምጠጣው ጋሼ፡፡

  • ለምንድን ነው የምትጠጣው?

  • በቃ የገጠር ኑሮ ጠብ የሚል ነገር የለውም፡፡

  • ለምን አትሠራም?

  • ኧረ እኔ ሥራ አስጠልቶኛል፡፡

  • ለመሆኑ ስንት ነው ዕድሜህ?

  • 31 ሞልቶኛል፡፡

  • በዚህ ዕድሜህ ነው ሥራ ያስጠላህ?

  • ምን እንዳማረኝ ያውቃሉ ጋሼ?

  • ምንድን ነው ያማረህ?

  • በቃ ሳልሠራ እንደ እርሶ እንደዚህ የተንፈላሰሰ ቤት ውስጥ መኖር፣ በቃ እሱ ነው ያማረኝ፡፡

  • መቼም የእናትህ አደራ የሚረሳ አይደለም፡፡

  • በቃ ጋሼ ተንቀባርሬ እንድኖር ያድርጉኝ፡፡

  • ስማ አሁን አንድ ሥራ እሰጥሃለሁ፡፡

  • ምንድን ነው ሥራው?

  • አንድ የሚሸጥ መሬት አለ፡፡

  • እሺ ጋሼ፡፡

  • ስለዚህ እኔ የምልክህ ገዢ ጋር ሄደህ በ50 ሚሊዮን ብር የሚሸጥ መሬት አለ ትለዋለህ፡፡

  • መሬት ነው አገር ነው በ50 ሚሊዮን ብር የሚሸጠው?

  • አንድ ቪላ ቤት ነው፡፡

  • ብሩ በዛ ብዬ ነው፡፡

  • ያልተጠየከውን አትቀባጥር፡፡

  • ይቅርታ ጋሼ፡፡

  • ከዛም መሬቱን የሚሸጠው ሰውዬ ጋ ሄደህ ቦታውን በ50 ሚሊዮን ብር የሚገዛ ሰው አግኝቼልሃለሁ ትለዋለህ፡፡

  • እሺ ጋሼ፡፡

  • ከዛ በቃ አንድ ሚሊዮን ብር የድለላ ታገኛለህ፡፡

  • ወይ ግሩም፡፡

  • ገብቶሃል?

  • ምንም አልገባኝም፡፡

  • መጀመሪያ ገዢውን ታገኛለህ፡፡

  • እሺ፡፡

  • ከዛም በ50 ሚሊዮን ብር የሚሸጥ…

  • አገር አለ እለዋለሁ፡፡

  • መሬት ነው አገር አይደለም የሚሸጠው፡፡

  • እሺ ይቅርታ፡፡

  • ከዛ ከሻጭ ጋር አገናኝተህ አንድ ሚሊዮን ብርህን ትቀበላለህ፡፡

  • እሺ ጋሼ አመሰግናለሁ፡፡

[የክቡር ሚኒስትሩ የቅርብ ዘመድ የመሬት ሽያጭ ኮሚሽኑን ከተቀበለ ከአራት ወራት በኋላ ቤታቸው መጣ]

  • አሁን ደግሞ ምን ፈለክ?

  • ጋሼ አንድ ችግር ገጥሞኝ ነው፡፡

  • የድለላውን ብር አልተቀበልክም እንዴ?

  • ኧረ ተቀብያለሁ፡፡

  • እኮ የምን ችግር ነው የምታወራው ታዲያ?

  • ብሩ ጠፋብኝ፡፡

  • ምን ሆኖ?

  • በቃ የከተማ ሰው አንዱ አበድረኝ ሲለኝ፣ አንዱ ጋብዘኝ ሲለኝ ብሯን አሟጠጥኳት፡፡

  • አንድ ሚሊዮኑን በአራት ወራት ውስጥ ጨረስከው?

  • ኧረ ያጠፋሁትማ በሁለት ወራት ነው፡፡

  • ታዲያ የት ነበርክ እስካሁን?

  • ጋሼ የእርሶን ፊት የማይበት አቅም አልነበረኝምና ለዛ ነው የጠፋሁት፡፡

  • ለማንኛውም አንድ ስልክ ልደውል፡፡

[ክቡር ሚኒስትሩ አንድ መኪና አስመጪ ጋ ደወሉ]

  • ጤና ይስጥልኝ ክቡር ሚኒስትር፡፡

  • በቃ አንተ የፈለከውን ካገኘህ በኋላ ጠፋህ አይደል?

  • ኧረ ክቡር ሚኒስትር ምን እጠፋለሁ? በጣም ስፈልግዎት ነበር፡፡

  • ያን ሁሉ ውለታ አድርጌልህ በዛው ትጠፋለህ?

  • ኧረ ክቡር ሚኒስትር ምን ላድርግልዎት?

  • አምስት ሲኖ ትራኮች ፈልጌ ነበር፡፡

  • ዛሬውኑ በስሞት አዘዋውርልዎታለሁ፡፡

  • በእኔ ስም አይሆንም በሌላ ስም ነው የሚሆነው፡፡

  • በማን ስም ይደረግ?

[ክቡር ሚኒስትሩ አስመጪው ስልኩን እንዲይዘው አድርገው፣ ዘመዳቸውን ማናገር ጀመሩ]

  • ስምህ ማን ነበር?

  • ድፋባቸው ብላባቸው፡፡

[ክቡር ሚኒስትሩ ወደ ስልኩ ተመለሱ]

  • ድፋባቸው ብላባቸው፡፡

  • ማን አሉኝ ክቡር ሚኒስትር?

  • ድፋባቸው ብላባቸው፡፡

  • ስሙ ግን ፀረ ልማታዊ ይመስላል፡፡

  • በቃ በዚህ ስም አድርጋቸው፡፡

[የክቡር ሚኒስትሩ ዘመድ መኪኖቹን ከወሰደ በኋላ ድጋሚ ከስሮ መጣ]

  • መቼም አሁን የመጣኸው ልትጋብዘኝ ነው?

  • አይ ጋሼ አንድ ነገር ገጥሞኝ ነው፡፡

  • መኪኖቹን አልወሰድክም እንዴ?

  • ኧረ ወስጄ ሥራም ጀምረዋል፡፡

  • ታዲያ ሥራ ከጀመሩ ምን ትፈልጋለህ?

  • ከዛ በኋላ መቼም የከተማ ሰው አንድ ክፉ ነገር አስተማረኝ፡፡

  • ምን ተማርክ?

  • ቁማር ተምሬ ጋሼ በቃ መኪኖቹን ተበላሁ፡፡

  • ምን?

  • አዎን ጋሼ በካርታ መኪኖቹን ተበላሁ፡፡

  • የሠራህበት ገንዘብስ?

  • መኪኖቹን ለማስመለስ ስጫወት እሱንም ተበላሁ፡፡

  • ወይ ጣጣ!

[ክቡር ሚኒስትሩ ቤት ሲገቡ ሚስታቸውን አገኟቸው]

  • ምን ሆነህ ነው የተናደድክ ትመስላለህ?

  • ምን ባክሽ አቃጥሎኝ ነዋ፡፡

  • እሳት ነው?

  • ኧረ ይኼ ድፋባቸው ነው እንጂ፡፡

  • ምን ደፋብህ?

  • ይኸው ሥራ የለኝም ብሎ በድለላ ያሰጠሁትን አንድ ሚሊዮን ብር በሁለት ወራት ውስጥ አጠፋው፡፡

  • ምን ችግር አለው አንተ አንድ ሚሊዮን ብር በወር አይደል እንዴ የምታጠፋው?

  • እኔ ታዲያ መቶ ሚሊዮን ኖሮኝ እኮ ነው አንድ ሚሊዮን የማጠፋው፣ እርሱ እንዴት አንድ ሚሊዮን ኖሮት አንዷን ያጠፋታል?

  • እሱስ ልክ ነህ፡፡

  • ከዛ ደግሞ አምስት ሲኖ ትራክ ሰጥቼው እነርሱንም በቁማር ተበላ፡፡

  • አንተ ዋነኛው የከተማው ቁማርተኛ አይደለህ እንዴ?

  • ቢሆንም እኔ ዋናዬን ይዤ ነው የምጫወተው፡፡

  • ችግሩ እኮ በአንድ ምሽት ሚሊየነሮችን መፍጠርህ ነው፡፡

  • ይኼማ የዕድገታችን መገለጫ ነው፡፡

  • የተገኘውም ገንዘብ እኮ በአንድ ምሽት እየጠፋ ነው፡፡

  • እሱ እኮ ነው ግራ ያጋባኝ፡፡

  • እሱማ የምን መገለጫ እንደሆነ እኔ ገብቶኛል፡፡

  • የምን መገለጫ ነው?

  • የጥፋታችሁ!

ክቡር ሚንስተር


Recent Posts

See All

ከስራ በሁዋላ አየሁዋት ሄድኩና

ኢትዮጵያ ውስጥ ስራ እንዲከበር ያደረገ ደርግ ነው፤ ከዛ በፊት ስራ የተናቀ ተግባር ነበር፤ “ዋይ ዋይ ባላባት እንግዲህ ቀረ ሳይሰሩ መብላት “ ይሉ ነበር የዩኒቨርስቲ ፋኖዎች! ደርግ ስራን አስከበረ፤ አንዳንዶች እንደውም ባንድ ጊዜ ሁለት ስራ ደርበው እሚሰሩ ነበሩ ! ለምሳሌ አትሌት ምሩፅ ይፍጠር ሩጫ ልምምድ ሲ