}); ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው

ክቡር ሚኒስትሩ ከደላላ ወዳጃቸው ጋር ተገናኝተው እያወሩ ነው


  • ክቡር ሚኒስትር እንዴት ነዎት?

  • ደህና ነኝ፡፡

  • መግለጫውን ሰሙት?

  • የትኛውን መግለጫ?

  • እኛን የሚመለከተውን መግለጫ ነዋ፡፡

  • ኢትዮ ኤርትራ ላይ የተሰጠውን መግለጫ ነው?

  • እሱ እኛን አይመለከትም እኮ፡፡

  • ባለፈው ኤርትራ ሄደን ኢንቨስት እናደርጋለን ስላልከኝ ነዋ፡፡

  • እሱን የሚመለከት ሳይሆን እኛን በዋናነት የሚመለከት መግለጫ ወጥቷል፡፡

  • ምንድነው እሱ?

  • የብሩ ጉዳይ ነዋ፡፡

  • የምን ብር?

  • በካዝና ያስቀመጥነው ብር ጉዳይ ነዋ፡፡

  • ስማ ላባችንን አንጠፍጥፈን ያመጣነው ገንዘብ አይደል እንዴ?

  • ምን አሉኝ ክቡር ሚኒስትር?

  • ጥረን ግረን ባፈራነው ገንዘብ እኮ ልንሸማቀቅ አይገባም፡፡

  • መንግሥት እኮ ይኼ አይገባውም፡፡

  • እንዴ በአገራችሁ አትሥሩ እየተባለ ነው?

  • መንግሥትማ ሕዝቡ ሠርቶና ለፍቶ እንዲያድግ ነው የሚፈልገው፡፡

  • ታዲያ እኛ የሕዝቡ አንድ አካል አይደለንም እንዴ?

  • እሱማ ነን፡፡

  • ታዲያ የራሳችንን ብር ባንክ አስቀመጥነው ካዝናችን ውስጥ አስቀመጥነው መንግሥት ምን አገባው?

  • ክቡር ሚኒስትር እኛም ካዝና ውስጥ ያስቀመጥነው ለምን እንደሆነ ያውቃሉ መቼም?

  • እኛ እኮ ባንኩን ስለማናምነው ነው ቤታችን በካዝና የምናስቀምጠው፡፡

  • ምክንያታችንማ እሱ አይደለም ክቡር ሚኒስትር፡፡

  • ምንድን ነው ታዲያ ምክንያታችን?

  • ባንክ ያለንን የገንዘብ መጠን እንዳያውቅብን ነዋ፡፡

  • እሱስ ቢሆን እንደ ሳዑዲ ባለሀብቶች ሀብታችንን የመደበቅ መብት የለንም እንዴ?

  • ክቡር ሚኒስትር ሀብቱም እኮ ቢሆን የእኛ አይደለም፡፡

  • ታዲያ የማነው?

  • ያው ግማሹ የስኳር፣ ግማሹ የባቡር ነው፡፡

  • እና አትደልሉ ልንባል ነው?

  • መደለልማ እንችላለን፡፡ እኛ ግን ሕገወጥ ድለላ ነው ያደረግነው፡፡

  • ለማንኛውም እኔ በዚህ አልስማማም፡፡

  • እኔ እኮ መግለጫው አስፈርቶኝ ነው፡፡

  • መግለጫው ምንድነው የሚለው?

  • ቤታችሁ ያለውን ገንዘብ አውጥታችሁ ባንክ አስቀምጡ እየተባልን ነው፡፡

  • ባናስቀምጥስ ምን ሊያደርጉን ነው?

  • ኦፕሬሽን እንጀምራለን ብለዋል፡፡

  • የምን ኦፕሬሽን ነው?

  • ያው እንግዲህ የቤት ለቤት አሰሳ ሊጀምሩ ይሆናላ፡፡

  • ካሰሳው በኋላ ምን ሊያደርጉ?

  • ካገኙማ ይወርሱናል፣ በዚያ ላይ ሌላ መዘዝ ሊኖረው ይችላል፡፡

  • ታዲያ አንተ ምን አሳሰበህ?

  • እንዴ ክቡር ሚኒስትር ከመንግሥት ኦፕሬሽን በፊት ብሩን ባንክ እንዲያስገቡት ነዋ?

  • እኔማ ሰሞኑን ይኼንኑ መግለጫ ሰምቼ ብሩን ወደ ሌላ ቦታ ለማሸሽ አስቤ ነበር፡፡

  • ክቡር ሚኒስትር ብቻ በመንግሥት ኦፕሬሽን ጉድ እንዳይሆኑ፡፡

  • ከመንግሥት ኦፕሬሽ በፊት በሌላ ኦፕሬሽን ጉድ ተሠርቻለሁ፡፡

  • በምን ኦፕሬሽን?

  • በአይጥ ኦፕሬሽን!

[ክቡር ሚኒስትሩ ምሳ ሊበሉ ቤት ሄደው ከሚስታቸው ጋር እያወሩ ነው]

  • ሰዓቱ ረፍዷል እኮ ቢሮ አትገባም እንዴ?

  • ባክሽ ዛሬ ቢሮ መግባት አልፈልግም፡፡

  • ምን ሆንክ ደግሞ?

  • ራሴን አሞኛል፡፡

  • ምን ሆነህ?

  • ሰሞኑን ከፍተኛ ጭንቀት ውስጥ ገብቻለሁ፡፡

  • ማታም እኮ ምንም እንቅልፍ አልተኛህም ነበር፣ ያው ሥራ ይኖርሃል ብዬ ነው፡፡

  • ምን ሥራ ይኖራል ብለሽ ነው? ብቻ ምንም ሰላም እየተሰማኝ አይደለም፡፡

  • የተፈጠረ ነገር አለ እንዴ?

  • የሰማሁት ነገር እየረበሸኝ ነው፡፡

  • ልትታሰር ነው እንዴ?

  • ኧረ ከኃላፊነቴ ሊያስነሱኝ ሳያስቡ አልቀረም፡፡

  • እንዴት አወቅክ?

  • መሥሪያ ቤት ሌላ ሰው አምጥተውብኛል፡፡

  • በላይህ ላይ?

  • አዲስ ሚኒስትር ዴኤታ ተሹሞብኝ ነው፡፡

  • ምን ችግር አለው ታዲያ?

  • ሰውየውን ቀልቤ አልወደደወም፣ አስፈርቶኛል፡፡

  • ዝም ብሎ ሰው አስፈራኝ ብሎ ነገር አለ እንዴ?

  • ለነገሩማ ስለሰውየውም እያጣራሁ ነው፡፡

  • ታዲያ ምን አገኘህ?

  • ሰውየው ሁለት ዶክትሬት ዲግሪ ነው ያለው፡፡

  • አንተስ ቢሆን አንድ የዶክትሬት ዲግሪ አለህ አይደል እንዴ?

  • የእኔ ታዲያ በግዥ ነዋ፡፡

  • የሰውየውስ ትክክለኛ መሆኑን አጣርተሃል?

  • እንዲያውም ሁለቱንም በወርቅ ሜዳሊያ ነው የጨረሰው፡፡

  • ምን ትቀልዳለህ? ሌላስ?

  • ስሚ ዩኤን በይው ሌሎች ዓለም አቀፍ ድርጅቶች ያልሠራበት ቦታ የለም፡፡

  • አንተስ ቢሆን ስንትና ስንት የውጭ ድርጅቶችን እያማከርክ አይደል እንዴ ያለኸው?

  • እኔ እኮ የውጭ ድርጅቶቹን የማማክረው በማስፈራራት ነው እንጂ እንደ እሱ በችሎታ አይደለም፡፡

  • እሱ ግን የውጭ ድርጅቶች ውስጥ የሚሠራ ከሆነ ለምን እናንተ ጋ መምጣት ፈለገ?

  • የሚገርምሽ እኮ ደመወዙን በስንትና ስንት ቀንሶ ነው ለመሥራት የመጣው፡፡

  • በጣም ነው የሚገርመው፡፡

  • ይኼ ደግሞ ሰውየው ምንም ለገንዘብ ደንታ እንደሌለው ነው የሚያሳው፡፡

  • አንተም ቢሆን እኮ ለገንዘብ ምንም ደንታ የለህም፡፡

  • ስሚ የሙሰኞች ቀንደኛው መሆኔን ረሳሽው እንዴ?

  • እሱስ ልክ ነህ፡፡

  • ሌላው የሚገርምሽ ደግሞ ሠራተኛው ሁሉ ወዶታል፡፡

  • አንተንስ አባታችን ነው አይደል እንዴ የሚሉህ?

  • ሰው እኮ ወረተኛ ነው ስልሽ፡፡

  • እና በአንዴ ጠሉህ?

  • አንቅረው ነው የተፉኝ፡፡

  • የሰው ነገር እኮ ይገርማል፡፡

  • አሁን ምን እንደማደርግ ጨንቆኛል፡፡

  • ፖለቲካውን ጥርስህን የነቀልክበት አይደል እንዴ ምን አስጨነቀህ?

  • ሊተኩኝ ይችላሉ ስልሽ? ቀለል አድርገሽማ እንዳታይው?

  • ስማ በዚያ በሁለቱም በኩል በተሳለው ሰይፍ ቆራርጠህ ለምን አትጥለውም?

  • በምን በተሳለው?

  • በሐሜትና በአሉባልታ!

[ክቡር ሚኒስትሩ ባቀረቡት ሪፖርት እየተገመገሙ ነው]

  • ክቡር ሚኒስትር ያቀረቡት ሪፖርት በጣም ደካማ ነው፡፡

  • እንዴት?

  • አሁን ካለው ለውጥ ጋር ሊቀጥሉ ይችላሉ ብዬ አላምንም፡፡

  • ምን እያላችሁ ነው?

  • ክቡር ሚኒስትር አስፈጽማለሁ ካሏቸው ሥራዎች ውስጥ አሥር በመቶውን እንኳን ማስፈጸም አልቻሉም እኮ?

  • እንደምታውቁት የሠራተኞቹ አቅም በጣም አነስተኛ ነው፡፡

  • ክቡር ሚኒስትር እኛ ባደረግነው ማጣራት እርስዎ ራስዎ በቀን ውስጥ ከሁለት ሰዓት በላይ ሥራ ላይ አይገኙም፡፡

  • ያው ለተለያዩ ስብሰባዎች ስለምወጣ እኮ ነው፡፡

  • ክቡር ሚኒስትር ስብሰባ እኮ ከሥራ ሰዓት ውጪ ቅዳሜና እሑድ ይደረግ ተብሏል፡፡

  • ወሬ ሌላ ተግባር ሌላ አሉ፡፡

  • ምን እያሉ ነው?

  • እናንተስ አወራችሁ እንጂ መቼ ተገበራችሁት?

  • ክቡር ሚኒስትር የታቀዱ ፕሮጀክቶች እኮ በጊዜያቸው እየተተገበሩ አይደለም፡፡

  • ታዲያ እኔ ምን ላድርግ?

  • ክቡር ሚኒስትር የሁሉ ነገር ችግር እኮ ወደ እርስዎ ነው የሚያመራው፡፡

  • አልገባኝም?

  • መሥሪያ ቤቱን በአግባቡ መምራት ስላልቻሉ ነዋ ፕሮጀክቶቹ እየተጓተቱ ያሉት?

  • በእኔ ምክንያት አይደለም እኮ ፕሮጀክቶቹ የተጓተቱት?

  • ክቡር ሚኒስትር በእርስዎ ስንፍና ነው ፕሮጀክቶቹ የተጓተቱት፡፡

  • ሰነፍ ነህ እያላችሁን ነው?

  • በሚገባ ክቡር ሚኒስትር፡፡

  • እኔ ግን ይኼን አልቀበልም፡፡

  • ለምን?

  • ሠራተኞቹ እኮ ናቸው ሰነፎቹ፡፡

  • ሠራተኞቹ ሰነፍ የሆኑት ሲቀጠሩ በችሎታ ሳይሆን በወንዝና በጅረት መሥፈርት ስለተቀጠሩ ነዋ፡፡

  • ታዲያ ሠራተኞቹ ሲቀጠሩ እኔ አልቀጥር፣ ራሱን የቻለ ቅጥር ኮሚቴ አለ አይደል እንዴ?

  • ቢሆንም ሥራውን ስለማይቆጣጠሩት መሥሪያ ቤቱ እርስዎን ነው የሚመስለው፡፡

  • አሁን ይኼን ሁሉ ውርጅብኝ የምታወርዱብኝ ለምንድነው?

  • እርስዎ በቅርቡ መነሳትዎ አይቀርም፡፡

  • እ . . .

  • ያው እርስዎን የሚተካ ሰው እስክናገኝ ድረስ ለጊዜው ይቀጥላሉ፡፡

  • እና አንስታችሁ አውላላ ሜዳ ላይ ልትጥሉኝ?

  • ለእርስዎ ምቹ ቦታ ይዘጋጅልዎታል፡፡

  • ምን ልታደርጉኝ?

  • አምባሳደር!

[ክቡር ሚኒስትር ከአማካሪያቸው ጋር ሆነው ዓመታዊ የሠራተኞች በዓል ላይ ስለሚጠሩ ሰዎች እያወሩ ነው]

  • አንተ ባለፈው የተነጋገርነው ነገር ረስተኸዋል መሰለኝ?

  • የትኛውን ነገር ክቡር ሚኒስትር?

  • በአገራችን ላይ የመጣውን ለውጥ በማስመልከት የሠራተኞችን ሞራል ለማነሳሳት ዓመታዊ የሠራተኞች ቀን በዓል ይኑረን አላልኩህም እንዴ?

  • እሱማ ብለውኛል፡፡

  • ታዲያ በበዓሉ ላይ የምንጠራው የእንግዶች ስም ዝርዝር የታለ?

  • የራሳችንን ሠራተኞች አይደል እንዴ የምንጠራው?

  • እኔ የምልህ የቪአይፒ ሊስቱን ነው፡፡

  • እሱንማ ይኼው እንኩ፡፡

  • እነማን ናቸው እነዚህ ሰዎች?

  • አያውቋቸውም ክቡር ሚኒስትር?

  • ለመሆኑ የመጀመርያው ማን ነው?

  • እኚህማ ኢትዮጵያዊ ውስጥ አሉ የተባሉ ሳይንቲስት ናቸው፡፡

  • የምን ሳይንቲስት?

  • በዕፀዋት ምርምር የታወቁ ሳይንቲስት ናቸው፡፡

  • ከእሱ ቀጥሎ ያለውስ ሰውዬ?

  • እሱ ደግሞ የታወቀ የሕክምና ባለሙያ ነው፡፡

  • በዓሉ እኮ የሠራተኞች የደም ልገሳ ቀን አይደለም፡፡

  • እንዴ ክቡር ሚኒስትር?

  • ይኼኛውስ ማን ነው?

  • እሱ ደግሞ ታዋቂ የባንክ ባለሙያ ነው፡፡

  • ስማ የሠራተኞች ብድርና ቁጠባ ተቋም ለማቋቋም አስበን አይደለም እኮ በዓሉን ያዘጋጀነው?

  • ምን እያሉ ነው ክቡር ሚኒስትር?

  • ለመሆኑ ይኼኛውስ ማን ነው?

  • በአገራችን አሉ የተባሉ አርክቴክት ናቸው፡፡

  • ሰውዬ ሕንፃችንን እናድስ ብዬሃለሁ እንዴ?

  • አሁን ግን ግራ አጋቡኝ ክቡር ሚኒስትር፡፡

  • እኔ እኮ ጥራልኝ ያልኩህ ቪአይፒ ሰዎችን ነው?

  • ከዚህ የበለጠ ቪአይፒ ከየት ይምጣ ታዲያ?

  • የቪአይፒ ትርጉሙን አታውቅም እንዴ?

  • ምን እያሉ ነው ክቡር ሚኒስትር?

  • አገሪቷ ውስጥ ያሉት የቪአይፒ ሰዎች ማን እንደሆኑ ታውቃለህ?

  • እነማን ናቸው?

  • ሙዚቀኞች፣ የድራማና የፊልም ተዋናዮች፣ ተወዛዋዦችና ተመሳሳይ የኪነ ጥበብ ባለሙያዎች ናቸው፡፡

  • እ . . .

  • እነዚህን ሰዎች እኮ ሕዝቡ በሙሉ ያውቃቸዋል፡፡

  • ክቡር ሚኒስትር እኔ የጥበብ ሰዎች ቪአይፒ አይደሉም እያልኩ ሳይሆን፣ እነሱ ብቻ ግን ቪአይፒዎች ሊሆኑ አይችሉም፡፡

  • ስማ የመንግሥት ትልልቅ ፕሮግራሞች ላይ እኮ ቪአይፒ ተብለው የሚጠሩት እነሱ ብቻ ናቸው፡፡

  • እርስዎ የሚፈልጉት ቪአይፒ ገብቶኛል ግን የቪአይፒ ትርጉሙ ይለወጣል፡፡

  • ትርጉሙ ምን ሊሆን?

  • Very Incompetent Person!